पशुपति युवा क्लब गुजरा फाइनलमा प्रवेश, उपाधिका लागि सिंगौल एफसीसँग भिड्ने

निजगढ–बाराको निजगढमा सञ्चालन भइरहेको दोस्रो सिंगौल नकआउट फुटबल प्रतियोगिताअन्तर्गत आईतबार सम्पन्न दोस्रो सेमिफाइनल खेलमा पशुपति युवा क्लब गुजरा विजयी हुँदै फाइनलमा प्रवेश गरेको छ ।

पशुपति युवा क्लब गुजराले ट्रयाक्टर संघ निजगढ–४ लाई १–० गोल अन्तरले पराजित गर्दै फाइनलमा सिंगौल एफसीसँगको भेट पक्का गरेको हो ।

पशुपतिको जितमा खेलको अन्तिम मिनेटमा राजकुमार तामाङ्गले गरेको एक मात्र गोल नै निर्णायक बन्यो ।

खेलमा उत्कृष्ट प्रदर्शन गरेका पशुपतिका राजकुमार तामाङ्ग म्यान अफ द म्याच घोषित भए । उनलाई कार्यक्रमका प्रमुख अतिथि निजगढ नगरपालिकाका कार्यपालिका सदस्य मानबहादुर डासेली  (अर्जन) ले ट्रफी प्रदान गरेका थिए ।

प्रतियोगिताअन्तर्गत फाईनल खेल मंगलबार दिउँसो ३ बजे हुनेछ ।

प्रतियोगिताको अवसरमा सोमबार दिउँसो ३ बजे महिला टिमको मैत्रीपूर्ण फुटबल आयोजना गरिएको आयोजक बन्देवी युवा क्लबका सचिव हस्तबहादुर दर्लामीले जानकारी दिए ।