होली एन्जल्सका विद्यार्थीको मनकारी मनः खाजा खर्च कटाएर बाढीपीडितलाई सहयोग

निजगढ–रसुवालगायत विभिन्न जिल्लामा आएको बाढीबाट प्रभावित नागरिकको सहयोगका लागि निजगढ–९ स्थित होली एन्जल्स इङ्लिस बोर्डिङ स्कुलका विद्यार्थीले आफ्नो खाजा खर्च कटाएर आर्थिक सहयोग गरेका छन् ।

विद्यालयमा अध्ययनरत कक्षा ६ देखि १० सम्मका विद्यार्थीले आफ्नो दैनिक खाजा खर्चबाट रु. ५ देखि ५ सयसम्म रकम संकलन गरी बाढीपीडितका लागि सहयोग गरेका हुन् । विद्यार्थीहरूले संकलन गरेको रु. ४० हजार ६ सय रकम विद्यालयका प्रिन्सिपल नारायण शर्मालाई हस्तान्तरण गरेका छन् ।

बाढीपहिरोबाट ज्यान गुमाएका व्यक्तिहरूप्रति श्रद्धाञ्जली व्यक्त गर्दै विद्यालय परिसरमा राष्ट्रिय झण्डा आधा झुकाइएको थियो । साथै मृतकको आत्माको शान्तिको कामना गर्दै विद्यार्थी तथा विद्यालय परिवारले एक मिनेट मौन धारण गरेका थिए ।

रकम हस्तान्तरण कार्यक्रममा रविना तिमल्सिनाले विपद्को समयमा सबैले आ–आफ्नो ठाउँबाट सहयोग गर्नुपर्ने बताइन् । उनले विद्यार्थीहरूले आफ्नो खाजा खर्च कटाएर गरेको सहयोगले मानवीय भावना र सामाजिक उत्तरदायित्वको उदाहरण प्रस्तुत गरेको बताइन् ।

विद्यालयका प्रिन्सिपल नारायण शर्माका अनुसार विद्यालयले संस्थागत रूपमा यसअघि नै एक लाख रुपैयाँभन्दा बढी सहयोग गरिसकेको छ । विद्यार्थी, आमा समूह, रेडक्रसकर्मी तथा विभिन्न संघसंस्थाबाट संकलित एक लाख रुपैयाँभन्दा बढी रकमबाट प्रभावित क्षेत्रमा आवश्यक सामग्री खरिद गरी हस्तान्तरण गर्ने योजना रहेको उनले जानकारी दिए ।

शर्माका अनुसार मनकामना आमा समूह, निजगढ–९ बाट रु. १५ हजार ५ सय ५५, रेडक्रसकर्मीबाट रु. ४६ हजार ५ सय ५० र अन्नपूर्ण बहुउद्देश्यीय सहकारी संस्था लिमिटेडबाट रु. १५ हजार सहयोग रकम संकलन भएको छ ।

विपद्को समयमा विद्यालयका विद्यार्थी, शिक्षक तथा विभिन्न सामाजिक संस्थाले आफ्नो क्षमता अनुसार सहयोग जुटाउँदै आएका छन् । विद्यार्थीहरूले खाजा खर्च कटाएर गरेको सहयोगले मानवीय सेवाप्रतिको जिम्मेवारी र सामाजिक संवेदनशीलताको सकारात्मक सन्देश दिएको छ ।