इनिसा विक हत्याको बलात्कारपछि हत्याको दोषीलाई कारबाहीको माग गर्दै निजगढमा प्रदर्शन

बारा—सुर्खेतको वीरेन्द्रनगरकी इनिसा विक हत्याकाण्डका दोषीलाई अविलम्ब कानुनी कारबाही गर्न माग गर्दै निजगढमा जागरुक महिलाको एक समुहले निजगढको शहीद चोकमा प्रदर्शन गरेका छन् ।

गत फागुन २३ गते बिहान करिब ६ बजे ट्युशन पढ्न भनी घरबाट बाहिर गएको र अबेरसम्म घर नफर्केकाले खोजी गर्दा विरेन्द्रनगर–४ स्थित शहीदपार्क नजिकको जनजागृति सामुदायिक वनमा शव फेला परेको थियो ।

निजगढमा आयोजित विरोध प्रदर्शनमा सहभागीहरूले हत्यामा संलग्न व्यक्तिहरूलाई तत्काल पक्राउ गरी कडा सजाय दिनुपर्ने माग गरेका थिए। उनीहरूले “न्याय चाहिन्छ”, “दोषीलाई सजाय देऊ” लगायतका नारासहित शान्तिपूर्ण प्रदर्शन गरेका थिए ।

प्रदर्शनमा स्थानीय महिला तथा विभिन्न सामाजिक संघ–संस्थाका प्रतिनिधिहरूको उल्लेखनीय सहभागिता रहेको थियो।

कार्यक्रम संयोजक सविना विष्टले घटनाको निष्पक्ष र तीव्र अनुसन्धान गरी पीडित परिवारलाई न्याय सुनिश्चित गर्न सम्बन्धित निकायसँग माग गरेका छन् ।

घरदेखि बाहिरसम्म महिला असुरक्षित रहेको भन्दै महिला सुरक्षित भएमात्रै समाज देशको विकास हुने बताईन् ।

त्यस्तै महिला अगुवा सरिता सापकोटाले महिलाहरु आफन्तैबाट बलात्कारको सिकार भईरहेको भन्दै त्यस्ता घटनाम संलगनलाई नयाँ सरकारले फाँसी दिने गरि दण्ड दिने विश्वास व्यक्त गरिन् ।

घटनाको विरोधमा बाराको सिमरासहित देशभर विभिन्न स्थानमा प्रदर्शन भईरहेको छ ।