रेसुङ्गा क्याम्पसले ९ जना शिक्षक र कर्मचारी हटाउने

387 shares

गुल्मी- आर्थिक सङ्कटकाल घोषणा गरेको गुल्मीको रेसुङ्गा बहुमुखी क्याम्पसले शिक्षक र कर्मचारी कटौती गर्ने भएको छ ।

आर्थिक अभावले क्याम्पस सञ्चालन गर्न कठिनाइ भएको भन्दै ३० साउनको सञ्चालक समिति बैठकले आर्थिक सङ्कटकालको घोषणा गरेको थियो ।

क्याम्पसले शिक्षक र कर्मचारी गरी ९ जना कटौती गर्ने भएको हो । सञ्चालक समितिले शिक्षक र कर्मचारीलाई स्वेच्छिक अवकाशमा जान भनेको छ । क्याम्पसका शिक्षक र कर्मचारीले ०७८ चैतदेखि ०७९ असार मसान्तसम्मको तलब पाएका छैनन् । उनीहरूलाई तलब भत्ताबापत एक करोड ३५ लाख रुपैयाँ दिन बाँकी रहेको छ ।

क्याम्पसलाई मासिक ८ लाख रुपैयाँ ऋण लागेपछि आर्थिक सङ्कटकाल घोषणा गरी शिक्षक र कर्मचारी कटौतीको निर्णयमा पुगेको सञ्चालक समिति अध्यक्ष श्रीप्रसाद भलामीले बताए ।

क्याम्पसमा अहिले विद्यार्थीबाट वार्षिक रूपमा हुने आम्दानी भन्दा प्राध्यापक र कर्मचारीको तलबमा मात्र झण्डै दोब्बर खर्च हुने गरेको छ । सञ्चालक समितिका अध्यक्ष भलामीका अनुसार विद्यार्थीको संख्यामा कमी हुँदा आम्दानीको स्रोत घटेको छ । जसका कारण हरेक वर्ष झण्डै डेढ करोड रुपैयाँ भन्दा बढी ऋण थपिँदै गएको छ ।

प्राध्यापक र कर्मचारी कटौतीपछि आर्थिक सङ्कटकाल फुकुवा हुनेछ । क्याम्पसलाई रेसुङ्गा नगरपालिकाले एक करोड रुपैयाँ आर्थिक सहयोग गर्ने भएको छ ।

२०३९ सालमा स्थापना भएको क्याम्पसले विगत ४० वर्षदेखि उच्च शिक्षा प्रदान गर्दै आएको छ । तर क्याम्पसमा आर्थिक सङ्कटकाल घोषणा भए लगत्तै पछिल्लो समय चारैतिर आलोचना भइरहेको छ । आर्थिक समस्याको निरूपणको लागि सञ्चालक समितिले स्रोत व्यवस्थापन गरिरहेको छ ।

हाल क्याम्पसमा ४१ जना प्राध्यापक कर्मचारी रहेका छन् । ७ वटा भवन रहेको रेसुङ्गा बहुमुखी क्याम्पसको ६५ रोपनी जग्गा रहेको छ ।