मुलुकमा सुशासन कायम गरी समृद्ध नेपाल निर्माण गर्न गठबन्धनले जित्नुपर्छ –शेखर कोइराला

काठमाडौं। मुलुकमा सुशासन कायम गरी समृद्ध नेपाल निर्माणका लागि गठबन्धन दललाई विजयी गराउन नेपाली कांग्रेसका केन्द्रीय सदस्य डा.शेखर कोइरालाले आग्रह गरेका छन् । कोइराला मोरङ निर्वाचन क्षेत्र नं ६ का प्रतिनिधिसभा सदस्य पदका उम्मेदवार हुन । आज राटनगर महानगरपालिका–४ स्थित राजवंशी चोकमा आयोजित कोणसभामा बोल्दै कांग्रेस भ्रष्टाचार नियन्त्रण गरी सुशासन कायम गर्न अत्यन्त गम्भीर रहेको र यसमा कुनै किसिमको शङ्का नगर्न अपिल गरेका छन् ।

उनले लोकतन्त्रलाई सुदृढीकरण गर्न, संविधानको रक्षा गर्न र भ्रष्टाचार नियन्त्रणका लागिसमेत आगामी निर्वाचनमा गठबन्धन दलले जित्नुपर्ने आवश्यक्ता रहेको उल्लेख गरेका छन् । नेता कोइरालाले विराटनगरलाई व्यवस्थित सहर निर्माण गर्ने जिम्मा गठबन्धनले लिएको उल्लेख गरेका छन् । उनले नगर भएर बग्ने दुई खोला केशलिया र सिंघियामा तटबन्ध निर्माण गरी व्यवस्थित र रमणीय बनाउनेतर्फ आफ्नो प्रयास रहने जिकिर गरेका छन् । केशलिया खोलामा सुनसरीको दुहवीदेखि विराटनगरको रानीसम्म सडक करिडोर निर्माण गर्न १४ अर्बको योजना अगाडि बढेको डा.कोइरालले सो अवसरमा जानकारी दिएका छन् ।