घुस प्रकरण : वडाध्यक्ष कार्की निलम्बन ! कसले पाउला जीतपुरसिमरा ३ काे कार्यबाहक ?

बारा-घर बाटो सिफारिसको क्रममा सेवाग्राहीसँग घुस रकम लिएको अभियोगमा पक्राउ परेका जीतपुरसिमरा उपमहानगर वडा नं ३ का वडाध्यक्ष ताराबहादुर कार्की निलम्बित भएका छन् ।

अख्तियार दुरुपयोग अनुसन्धान आयोग केन्द्रीय कार्यालय काठमाडौँले वडाध्यक्ष कार्की पदमुक्त भएको विषयमा उपमहानगरलाई अति गोप्य पत्र मार्फत जानकारी गराएको हो ।

कार्कीलाई घर बाटो सिफारिसको लागि स्थानीय राजन उप्रेतीसँग ५ लाख नगद रकम लिँदै गरेको अवस्थामा अख्तियारको हेटौँडाको टोलीले जीतपुर स्थित जैशवाल होटेलबाट नियन्त्रणमा लिएको थियो ।

आयोगले कार्कीलाई सोमबार नगद रकम सहित नियन्त्रणमा लिएर सोही केन्द्रीय कार्यालय काठमाडौँ पठाएको हो । सोही दिनदेखि लागु हुने गरी आयोगले वडाध्यक्ष कार्कीलाई निलम्बन गरेको हो ।

‘अख्तियार दुरुपयोग अनुसन्धान आयोग ऐन २०४८ को दफा १६ (४) बमोजिम पुष २ गतेबाटै लागु हुने गरी विशेष अदालत काठमाडाैँबाट म्याद थप भई आएको र यसरी थुनामा रहेका व्यक्ती सार्वजनिक पद धारण गरेका राष्ट्रसेवक भए आयोगको ऐन २०४८ को दफा १७ तथा भष्टचार निवारण ऐन २०५९ को दफा ३३ बमोजिम स्वतः निलम्बन रहने कानुनी व्यवस्था रहेको जानकारी गराईन्छ’ आयोगले उपमहानगरलाई पठाएको पत्रमा उल्लेख ।

कार्यबहाकले वडा चलाउने

कार्की निलम्बनमा परेसँगै वडा कार्यालय कार्यबाहक वडा अध्यक्षले चलाउनु पर्ने छ ।

स्थानीय सरकार सञ्चालन ऐन २०७४ को दफा ११६ अनुसार वडाध्यक्षको पद कुनै कारणले रिक्त भएमा वडा समितिका सदस्यहरूले आफूहरू मध्येबाट छनोट गरेको सदस्यले कार्यवाहक वडाध्यक्ष भई काम गर्नेछ भनी उल्लेख छ । साथै कुनै वडाको निर्वाचन नभएको अवस्थामा कार्यपालिकाले कुनै कर्मचारीलाई वडाध्यक्षको कार्य गर्ने गरी तोक्न सक्ने व्यवस्था छ ।

कार्यवाहक वडाध्यक्षका लागि सम्बन्धित वडा सस्य र कार्यपालिका बैठकबाट निर्णय हुन नसकेको अवस्थामा भने कार्यवाहक वडाध्यक्ष तोक्ने अन्तिम अधिकार नगरप्रमुखमा रहने कानुनी व्यवस्था छ ।

काे-काे छन् आकाक्षि ?

कार्यबाहक वडा अध्यक्षका अधिकांश वडा सदस्य आकाक्षि देखिएका छन् । कार्यबाहक पाउन उनीहरुले लविङ सुरु गरेका छन् ।

दलित महिला सदस्य माया बिक, महिला सदस्य अनिता खत्री, वडा सदस्य चीनबहादुर पाख्रिनले लविङ गरिरहेका हुन् । वडा सदस्य देव चाैधरीले कम रुची देखाएका छन् ।

नेकपा (एमाले) बाट निर्वाचित भएका उनीहरुमध्ये कसलाई कार्यबाहक दिने भनेर पार्टीकाे आन्तरिक छलफल भईरहेकाे बुझिएको छ ।