skip this hetauda tech

विश्वकप लिग– २ आजदेखि सुरु हुँदै, पहिलो खेलमा नेपालले नामिबियासँग खेल्ने

483 shares
oil-nigam-amlekhgunj-adv.jpeg

काठमाडौँ–आईसीसी क्रिकेट विश्वकप लिग– २ (२०२३–२०२७) को सिरिज आजदेखि सुरु हुँदैछ । सन् २०२७ मा हुने क्रिकेट विश्वकपमा छनौटको प्रक्रिया अन्तर्गत आजदेखि काठमाडौँमा सिरिज हुन लागेको हो ।

आज पहिलो खेलमा नेपाल र नामिबियाबीच प्रतिस्पर्धा हुनेछ । खेल कीर्तिपुरस्थित टीयू क्रिकेट मैदानमा बिहान सवा ९ बजे सुरु हुनेछ ।

नेपाल क्रिकेट संघ (क्यान) ले यस सिरिजका लागि घोषणा गरेको टिममा दुई परिवर्तन गर्दै आफ्नो टिम हिजो सार्वजनिक गरेको थियो ।

क्यानडाविरुद्धको एकदिवसीय सिरिजमा उत्कृष्ट प्रदर्शन गरेका अनिल र देवलाई क्यानले लिग– २ खेल्ने टिममा समावेश गरेको छ । क्यानले रिजन ढकाल र अर्जुन साउदलाई बाहिर राखेर अनिल र देवलाई टिममा समावेश गरेको छ ।

क्यानले लिग– २ मा अलराउन्डर दीपेन्द्रसिंह ऐरी, करण केसी र गुलसन झालाई पनि समेटेको छ । लिग– २ को सिरिज खेल्ने नेपाली टिममा रोहित पौडेल (कप्तान), आसिफ शेख, देव खनाल, अनिल शाह, कुशल भुर्तेल, कुशल मल्ल, आरिफ शेख, पवन सर्राफ, भीम सार्की, दीपेन्द्र सिंह ऐरी, गुलसन झा, सोमपाल कामी, करण केसी, ललित राजवंशी र सूर्य तामाङ रहेका छन् ।

आईसीसीले क्रिकेट विश्वकपमा छनौट हुन यस अघि (२०१९–२०२३) मा पनि यही फर्म्याटमा प्रक्रिया शुरु गरेको थियो ।

लिग– २ मा ८ देश सहभागी छन् । जसमा नेपालसहित नेदरल्याण्ड्स, नामिबिया, क्यानडा, ओमान, स्कटल्याण्ड, युएई र अमेरिका रहेका छन् ।

आईसीसीका अनुसार लिग– २ मा शीर्ष ४ स्थानमा रहने टिम विश्वकप क्वालिफायरमा छनौट हुनेछन् भने पछाडि रहेका ४ देशले पनि विश्वकपमा छनौट हुने अवसर पाउने छन् ।

खेल तालिका यस्तो छ–

फागुन ३ गते बिहीबार– नेपाल र नामिबिया
फागुन ५ गते शनिबार– नेपाल र नेदरल्याण्ड्स
फागुन ७ गते सोमबार– नामिबिया र नेदरल्याण्ड्स
फागुन ९ गते बुधबार’ नेपाल र नामिबिया
फागुन ११ गते शुक्रबार– नामिबिया र नेदरल्याण्ड्स
फागुन १३ गते आइतबार– नेपाल र नेदरल्याण्ड्स

nijgadh-supermart-adz1200-630