नेराआवि लालको ३६ औँ वार्षिक उत्सव तथा अभिभावक दिवसको तयारी सुरु

बारा–निजगढ नगरपालिका–१०, लालस्थित श्री नेपाल राष्ट्रिय आधारभूत विद्यालयले आफ्नो ३६ औँ वार्षिक उत्सव तथा अभिभावक दिवस आगामी पुस २९ गते भव्य रूपमा आयोजना गर्ने भएको छ ।

विद्यालय व्यवस्थापन समितिका अध्यक्ष शिद्धार्थ लोप्चनले विद्यालयले शिक्षा, संस्कार र भविष्य निर्माणको साझा यात्रामा सबैको सक्रिय सहभागिता अपरिहार्य रहेको बताउँदै उक्त कार्यक्रममा उपस्थित भई बालबालिकाको प्रतिभा, मेहनत र उपलब्धिको साक्षी बन्न सम्पूर्ण अभिभावकज्यू, शिक्षाप्रेमी महानुभाव तथा शुभेच्छुकहरूलाई आमन्त्रण गरिएको जानकारी दिए ।

वार्षिक उत्सव तथा अभिभावक दिवस कार्यक्रममा विद्यार्थीहरूले शैक्षिक, सांस्कृतिक तथा सिर्जनात्मक प्रस्तुतिहरू मार्फत आफ्नो क्षमता प्रदर्शन गर्ने विद्यालयले जनाएको छ । अभिभावक र समुदायको उपस्थितिले विद्यालय परिवारलाई थप उत्साह, प्रेरणा र आत्मविश्वास मिल्ने विश्वास विद्यालय व्यवस्थापन समितिले व्यक्त गरेको छ ।

कार्यक्रमले विद्यालय र अभिभावकबीचको सम्बन्धलाई अझ सुदृढ बनाउँदै गुणस्तरीय शिक्षाको विकासमा महत्वपूर्ण योगदान पुर्‍याउने अपेक्षा गरिएको छ ।