नेराआवि बजनीमा डेढ दशकअघि सञ्चालित महायज्ञको बोलकबोल दान रकम संकलन गर्न समिति गठन

बारा–बाराको जीतपुरसिमरा उपमहानगरपालिका–३ बजनीस्थित श्री नेपाल राष्ट्रिय आधारभूत विद्यालयमा डेढ दशक अघि सञ्चालित श्रीमद भागवत सप्ताह ज्ञान महायज्ञमा बोलकबुल दान रकम संकलन गर्न समिति बनाईएको छ ।

२०६७ जेठ १६ देखि २३ गतेसम्म विद्यालयमा सञ्चालित महायज्ञमा दान कबोल गरेका दाताहरूबाट उठ्न पर्ने रकम संकलनका लागि समाजसेवी अमृतलाल श्रेष्ठको संयोजकत्वमा ११ सदस्य समिति गठन गरिएको छ ।

विद्यालय व्यवस्थापन समितिका अध्यक्ष मदनप्रसाद तिमल्सिनाको अध्यक्षतामा विद्यालयमा आईतबार विद्यालय व्यवस्थापन समिती, सामाजिक व्यक्तित्वहरु भद्रभलादमी, शिक्षा प्रेमी अभिभावक लगायतको भेलाले श्रेष्ठको संयोजकत्वमा समिति गठन भएको हो ।

समितिको सह–संयोजकमा शिक्षा ढुङ्गाना, सदस्यमा जगनाथ घिमिरे, कृष्ण खनाल, चेतनाथ रिमाल, भैरव थपलिया, अनिता खत्री, नारायण उप्रेती, शुसिल ढोडारी, बलराम चिमरिया, सदस्य सचिवमा विद्यालयका प्रधानाध्यापक दिनेश पराजुली रहेका छन् ।
यसैविच भेलापछि दाताहरुले विद्यालयको बोलकबुल रकम हस्तान्तरण गर्न थालेका छन् ।

जीतपुरसिमरा उपमहानगरपालिका–३ की पार्वती रिमालले पाँच हजारको चेक संयोजक श्रेष्ठ र प्रधानाध्यापक पराजुलीलाई संयुक्त रुपमा हस्तान्तरण गरेका छन् ।

त्यस्तै जीतपुरसिमरा उपमहानगरपालिका–३ का आवरसिंह क्षेत्रीले ११ हजार नगद विद्यालयका प्रअ पराजुलीलाई हस्तान्तरण गरेका छन् ।

महायज्ञमा बोलकबुल दान रकम संकलन गरेर विद्यालयको कृषि विकास बैंक सिमरा शाखामा रहेको अक्षयकोषमा जम्मा गरिने भएको छ ।

विद्यालयले केहि समयअघि विद्यालयको सहयोगार्थ अक्षयकोष स्थापना गरेर कृषि विकास बैंक सिमरा, शाखामा खाता सार्वजनिक गरेको थियो ।

महायज्ञका दाता र भूतपूर्व विद्यार्थी, शिक्षक, पूर्व शिक्षक, विभिन्न विशिष्ट व्यक्तित्वहरु, सामाजिक संघ संस्थाहरुलाई कृषि विकास बैंक सिमरा, शाखामा खोलिएको अक्षय कोषको खाता नं.०५०७८०५६५९००९०१३ मा रकम जम्मा गरिदिन प्रअ पराजुलीले अपील गरेका छन् ।