श्री विशाल बद्रीनाथ मन्दिर निजगढमा सञ्चालित एक महिने धनुर्मास गोदाम्बा कथा प्रवचन कार्यक्रम समापन

बारा–बाराको निजगढ–४ पुरानोटोलस्थित श्री विशाल बद्रीनाथ मन्दिरमा सञ्चालित एक महिने धनुर्मास गोदाम्बा कथा प्रवचन कार्यक्रम समापन भएको छ ।

पौष १ गतेदेखिबाट सुरु भएको धनुरमासमा गोदाम्बा कथा प्रवचन कार्यक्रम अन्तर्गत प्रत्येक दिन कथा बाचनका साथै प्रसाद वितरण गरिएको थियो भने हरेक साँझ भजन किर्तन समेत भएको थियो ।

सत्ताइसौँ दिनमा जगत जननी महालक्ष्मी गोदाम्बा र श्री रङ्गनाथ भगवानको बीच शुभ विवाह भएको दिनको अवसरमा कल्याण उत्सव (विवाह उत्सव) गरिएको थियो ।

साथै श्री विशाल बद्रीनाथ मन्दिरका महन्त सुदर्शन रामानुजदासले गोदा रङ्गनाथ भगवानको पूजा अर्चना र आरती समेत गरेका छन् । उनले २६ दिनसम्म कथा बाचन समेत गरेका थिए ।

२७ औं दिन स्वामीजी श्री श्री १०८ राम प्रपन्नचार्यले धनुरमासमा गोदाम्बा कथा प्रवचन गरेका थिए ।

कार्यक्रममा बाल कलाकारहरु भजन कृतन समेत गरेका थिए । गायनमा सक्षम कार्की, मादलमा मन्दिप अधिकारी, अमिर सापकोटा र युजन बुढाथोकीले प्रस्तुति दिएका हुन् । बाल कलाकारलाई कथा बाचक स्वामीजी श्री श्री १०८ राम प्रपन्नचार्यको हस्तकमलबाट सम्मान पनि भएको थियो ।

एक महिना अवधिको धनुरमासमा गोदाम्बा कथा सञ्चालनका प्रत्येक दिन भक्तजनहरुले पालैपालो सहयोग गरेका थिए ।