दक्षिण कोरियाका प्रवासी नेपालीको परिवारलाई वित्तीय साक्षरता सिकाउँदै अंकुर नेपाल (भिडियो)

बारा–दक्षिण कोरियामा विभिन्न पेशा व्यवसायमा संलग्न भई नेपाल फर्किएर स्वदेशमै बस्न चाहने नेपालीहरुलाई एकताबद्ध गर्दै सहयोग आदनप्रदान लगायत सामाजिक, व्यवसायिक तथा आर्थिक रुपमा पुनःस्थापित हुन सहयोग पु¥याउदै आएको संस्था हो, अंकुर नेपाल ।

कोरियन अन्तर्राष्ट्रिय सहयोग निकाय (कोइका) अन्तर्गत के– हामी, ह्याप्पी माइग्रेशन परियोजनाको सहयोगमा अंकुर नेपालले देशका विभिन्न प्रदेशमा प्रदेशस्तरिय वित्तीय साक्षरता तालिम सञ्चालन गरिरहेको छ ।

यसैक्रममा अंकुर नेपालले बाराको निजगढमा मधेस प्रदेश स्तरिय तालिम सम्पन्न गरेको छ । कोरियाका प्रवासी नेपाली कामदारहरुको परिवारका सदस्यहरुको लागि आयोजित तालिममा मधेस प्रदेशका विभिन्न जिल्लाबाट इपिएस रोजगारीको क्रममा कोरियामा रहेका नेपाली श्रमिक परिवारका ५५ जना सहभागि भए ।

तालिमका सहभागिलाई नेपाल बैंक लिमिटेडका निजगढ शाखाका सहायक प्रमुख हरिप्रसाद उपाध्याय र कार्यक्रम संयोजक राजु चौलागाईले प्रशिक्षण दिएका थिए ।

बैंकका सहायक प्रमुख उपाध्यायले सहभागीहरुलाई वित्तीय साक्षरताका विभिन्न पक्षबारे प्रशिक्षण दिएका थिए । उनले कोरियामा श्रम गरेर पठाएको रकमको सदुपयोग, खर्च व्यवस्थापन र दीर्घकालीन आर्थिक स्थायित्वका लागि नेपालमा बस्ने परिवारका सदस्यहरुले अपनाउनुपर्ने आवश्यक ज्ञान र सीपको विषयमा प्रशिक्षण दिएका हुन् ।

त्यसैगरी कार्यक्रमका संयोजक राजु चौलागाईले कोरिया आप्रवासी कामदारका अभिभावक र आफन्तको दायित्व र जिम्मेवारी बारेमा प्रशिक्षण दिएका थिए ।

यसअघि तालिमको निजगढको होटल राजमार्गमा आयोजित तालिमको निजगढ नगरपालिका नगर प्रमुख सुरथ पुरीले पानसमा बत्ती बालेर उद्घाटन गरेका थिए ।

उद्घाटन समारोहलाई सम्बोधन गर्दै नगर प्रमुख पुरीले वैदेशिक रोजगारीमा गएकाहरुले आफन्तलाई पठाएको रकम उत्पादनमूलक कार्यमा मात्र खर्च गरिनुपर्नेमा जोड दिए । विभिन्न सम्भावना बोकेको निजगढमा लगानी गर्न समेत मेयर पुरीले आह्वान गरे ।

कार्यक्रममा कोरिया रिटर्नीले आफ्नो अनुभवमा आधारित सफलताका कथा सुनाएका थिए ।

सन् २०११ मा कोरिया पुगेर छुटुप लामाले त्यहाँ पुग्दाको प्रकृयादेखि आफुले गरेको सघर्ष सुनाएका थिए ।

त्यस्तै नवराज चौलागाईले कोरियाबाट नेपाल फर्किएपछि शुरु गरेको व्यवसायमा आधारित ‘सफलताको कथा’ सुनाएका थिए ।

कार्यक्रममा रिटर्नी फेडेरेशन नेपाल मधेस प्रदेश अध्यक्ष दिपक श्रेष्ठ, रटर्नी फेडेरेशन नेपालका पूर्व केन्द्रीय उपाध्यक्ष रामकृष्ण घिमिरे, वडा नम्बर ३ का वडा अध्यक्ष गोकुल तिमल्सिना, वडा नम्बर ५ का वडा अध्यक्ष सूर्यबहादुर थापा र वडा नम्बर ७ का वडा अध्यक्ष टेकबहादुर लामालगायतको सहभागिता रहेको थियो ।

अंकुर नेपालका सचिव खेम कार्कीको अध्यक्षतामा भएको सो कार्यक्रमको सञ्चालन विनोद कार्कीले गरेका थिए ।